أحباتىو أخواتي  عضوات وحتى زائرات  منتدانا الغالى
يسعدنا نحن طاقم اداريات مطبخ منتدى لالة بثينة  ان نهنئكم بعيد الاضحى المبارك
ونسأل الله تعالى ان يعيده علينا وعليكم بالخير والعافية , وان يتقبل ممن حج , نسكه وتعبده ,
ومن المسلمين صالح اعمالهم
وأن يعم الأمن والأمان فى بلادنا الحبيبه المغرب 
ونقول لكم دامت حياتكم , عامرة بالافراح والاعياد إن شاء الله تعالى 


وكما عودناكم فى جميع المناسبات عن تسهيل سبل الراحه لكم فى البحث عن الوصفات المهمه و  السهلة  لهذه المناسبه
تم تجميع أجمل وأهم وصفات عيد الأضحى المبارك من من إقتراح الشيف هدى اليداري التي تعرض على إذاعة شذى فم
chada fm 
في برنامج شذى الأسرة  chada loussra مع الإعلامية أمينة أحريس 

ونتمنى من الله عز وجل أن تنول رضاكم ان شاء الله

سنحاول  بمعيتكم وضع جميع أطباق عيد الأضحى التقليدية والعصرية المغربية 
وطرق تقديمها بلمسة سحرية 
معاصرة تجمع بين الأصاالة و المعاصرة 
من ضمنها وليس كلها 









لا تبخلو علينا بأرائكم و انتقاداتكم 
وتقاسم الوصفات الناجحة للشيف هدى اليداري  جزاكم الله كل خير

مشكورة أختي  المجهودات كتبها الله في ميزان حسناتكم  
الراس مبخر – هدى اليداري
مللي يتشوط الراس نحكوه مزياان حتى يولي ابيض و نقسموه على 4 ونحيدة منو المخ ونديروه في كوكوط ونعمر عليه الما تقريبا ايطرو + ربع بصلة صحيحة + خيزوة مقسومة على 2 + الربيع مقبط + 1 ثوم + ملح + قزبر يابس + نص م ص كامون ونسد الكوكوط ونخلهيا 20 دقيقة من بعد ما تصفر ونصفيه من كولشي
شوية كامون + قزبر يابس + عطرية اللحم + م ك زيت عود + ملح ونخلطهم وندهن الراس و نديرو يتبخر ويتغطى بميكة بيضاء
ايلا كان راس صغير 10 دقايق يطيب وايلا كان كبير نص ساعة حتى يولي بحال الزبدة
ونفرش ليه النعناع او الربيع و الخضر خضراء


راس الحولي بالمرقة– هدى اليداري
الما يطيب مع طرف الحامض حتى يغلى ونطفي البوطة و ندير فيه الراس نص ساعة
نصفيه و يتغسل بالما بارد و نحطو في شبكة حتى يقطر مزيااان
الراس في طنجرة ونحك بصلة صغيرة + 2 ثوم + ربع كاس زيت عود + ربع م ص السمن + ملح + عةد قرفة كبير مغسول + نص م ص كامون + نص م ص عطرية المروزية + راس م ص ابزار + نص م ص طحميرة + راس م ص السودانية + الربيع + نص كاس الماء عنبة و نخليه يتشحر 10 دقايق على نار مهيلة + زلافة حمص مرقد ونرجعوا نقليوه 10دقايق + الما ايطرو او اقل بشوية + 2 تمرات بلا عظم و نسد الكوكوط و نخليه 20 دقيقة ومن بعد نحل الكوكوط ونضيف بصلة كبيرة مشفرة ونعاود نسد الكوكوط ونخليه يطيب من نص ساعة حتى لساعة من بعد ما تصفر الكوكوط


الكرعين – هدى اليداري
الكرعين في كوكوط + 2 بصل شرائح + 4 ثوم + ربع م ص السمن + نص كاس زيت مخلط + ملح + عطرية اللحم نص م ص + ربع م ص عطرية المروزية + م ص سكينجبير+ نص م ص طحميرة + ورقة موسى + شوية قزبر يابس + راس م ص كامون + الربيع ويتشحر مزيااان على نار مهيلة + نص م ص مطيشة الحك مخففة + الماء اللي يغطي كولشي + زلافة اللوبيا مرقدة او الحمص + تمرة بالعظم او بلاش اللي بغيتو و نسد عليهم نص ساعة


المجبنة - هدى اليداري

طريفات اللحم قطبان + طريف الكبدة + و نشرمل بالربيع و الثوم غبرة و قزبر يابس و عطرية اللحم + ملح وكامون و طحميرة و شوية الخل البلدي
ناخدو لاطة وندهنها بم ك الزيت او ورق الطهي و ندير فوق منو اللحم و ندخلو الفران سخون بزاااف و يكون منقوص بزاااف
من بعد نضيف قطع الشحمة اختيارية
تاخد المجبنة ونعمرها باللحم و نخيطها و نعلقها حتى تكرم الجلدة في الشمس من الاحسن ومن بعد ما تقساح الجلدة نديرها في المجمد حتى نبغيها




مقيلة اللحم السلاوية - هدى اليداري
نشرمل رابعة تقيطعات ديال اللحم + الشحمة بالخل العادي م ص او الخل الصحراوي + الملح + الربيع + نص م ص قزبر يابس + نص م ص طحميرة + راس م ص شوية السودانية + نص م ص كامون + م ص عطرية اللحم + 3 م ك الما و نشرملو ونخليه ليلة كاملة
بصلة مشلظة رقيقة بزاف ونديروها في مقلة او طجين و تشحر مع زيت و2 ثوم محكوك وتشحر على نار مهيلة + اللحم ونغطي بلا ما نضيف الما و نخليه يطيب بلا ما نحرك 10 دقايق غادي يطلق الما و يبدا يطيب و نحرك مزياان ونخليه يطيب مازال 10 دقايق او اكثر حتى يطيب مع التحراك مرة مرة حتى ينشف من الما ونقدموه مرافق للزيتون مشرمل





كتف معمر مالح وحلو في الفران او الطنجرة - هدى اليداري
الحشوة :
2 خيزو محكوك طويل + 2 كرعات + بصلة كبيرة محكوكة ونخلط ونديرهم في المقلة مع الزيت و تشحر مزياان حتى تدبل و نحطو حتى يبرد ونضيفو على رابعة الكفتة + الربيع + نص م ص بصلة غبرة + نص م ص عطرية اللحم + راس م ص ابزار + ملح + 4 او 5 الفرماج + شوية الفرماج احمر ونخلط مزيااان باليد
ونحل الكتف من الوسط ونعمروه بالحشوة وندخلها حتى كتبسط ونخيطوه بخيط معقم بالخل
ندهنوه ببصلة صغيرة محكوكة او م ك البصلة غبرة + م ص السمن + م ص الزبدة + نص م ص عطرية اللحم + م ص عصير الحامض + ملح + قزبر يابس ربع م ص + وضرس الثوم او شوية الثوم غبرة و نخلط مزيان و ندهن الكتف و نتقبو بقطيب وندخلو الفران يطيب مع نص كاس الما في اللاطة او فوق ورق الطهي مع الماء دائما ساعة تقريبا تكون العافية غير من لتحت على نار مهيلة وما نشعلوش الفوق نهائيا

الحشوة الحلوة
رابعة الكفتة + شوية الكركاع + شوية اللوز + الزبيب +البيسطاش + الاكاجو + نوازيط + الكوك كراميل او عادي
نديرو كل هاد المكونات او غير شوية منهم
اللوز ندهنو بشوية الزيت و ندخلو الفران
الاكاجو و الكركاع و النوازيط يدخل الفران
كولشي يتهروش ونخلطهم مع الكفتة خضرا + 2 م ك حليب مركز محلى او 2 م ك العسل + قبصة ملح + ربع م ص عطرية اللحم + 2 حبة مسكة حرة + 2م ك الزبدة مرخوفة وايلا عندنا البراليني نضيف م ك ونعجن كولشي ونعمر الكتف
وندهنوه ب :
م ك البراليني + شوية عطرية اللحم + بصلة غبرة + شوية الملح + الزبدة م ك ونخلط وندهن الكتف ونديرو فوق ورق الطهي مع نص كاس عنبة الما و نتقبوه ويدخل الفران





القطبان اللحم - هدى اليداري
نص كيلو قطبان اللحم مع الشحمة + م ك زيت عادي + م ك زيت عود + م ص الخل او نص م ص عصير الحامض + ملح + الربيع + 2 ثوم محكوك او ثوم غبرة + بصلة غبرة اختيارية + نص م ص قزبر يابس + نص م ص طحميرة + نص م ص كامون + ربع م ص عطرية اللحم + شوية سودانية + بصلة محكوكة في حكاكة غليظة ونخلط مزياان ونرقدوهم ساعتين







التقلية - هدى اليداري
الرية نلقي ليها الروبيني في القصبة و نخليها تنفخ باش يزول الدم
نقطع الكرشة على 4 وتغسل و ناخد ما مغلي معاه ضرس الثوم وشوية الحامض م ك و تغلى مزيان وندير فيها الكرشة من بعد ما طفيت البوطة ونخليها 5 دقايق
ونبدا نكرطها مزيااان حتى تولي بيضاء ونقطعها مربعات
الرية حتى هي نفس الطريقة
نجمع الكرشة و الرية و باقي المكونات نديرهم في بانيو مع نص م ص الملح + م ص قزبر يابس + م ك عصير الحامض او الخل ونخلط بدون ماء و نغطيها ربع ساعة
من بعد نغسلها 2 مرات حتى تصفى و نخليها تقطر
التقلية في الطنجرة مع نص كاس زيت مخلط او زيت العود + بصلة كبيرة محكوكة + نص م ص السمن + عود قرفة + م ص سكينجبير + ربع م ص ابزار + م ص عطرية اللحم + ربع م ص او نص م ص عطرية المروزية + 3 ثوم + م ص عصير الحامض + شوية خرقوم بلدي + شوية زعفران حر و نشرملها مزيااان ونديرها تقلى على نار متوسطة وتشحر مزيااااان نص ساعة + كاس كبير الما + ربع حامضة مرقدة مغسولة +الربيع مقبط ونسد الطنجرة نخليها تغلى علىىى خاطرها
مللي تقرب طيب ندير فوق منها الزيتون احمر مشقق و قشرات الحامض مرقد و الربيع




الكوطليط - هدى اليداري
الكوطليط في كوكوط + م ص الزبدة + 2 ثوم محكوك + نص كاس عنبة الما + ربع م ص قزبر يابس + ربع م ص كامون + شةيى سودانية + ملح و نسد الكوكوط حتى طلع الغلية و نقصها و نخليها حتى ينشف الما تقريبا 10 دقايق من بعد الغليان
ناخدو ونديرو في الشواية 2 دقايق من كل جهة





كسكس العيد – هدى اليداري
اللحم في برمة + بصلة كبيرة مشفرة + بصلة محكوكة + نص كاس زيت مخلط يتشحرو شوية + م ص سكينجبير + م ص عطرية اللحم + ربع م ص مروزية + م ص خليط زعفران او خرقوم بلدي + نص م ص ابزار + نص كاس ما شغير و نخلي اللحم يتشحر مزيااان + 2 حبات مطيشة محكوكة رقيق بالزريعة + خيزوة محكوكة + وطريف كرعة حمرا محكوكة ونغطي الطنجرة و نخليه يتشحر مزيااان ربع ساعة + الما تقريبا ايطرو و نص ونغطي الطنجرة حتى تطلع الغلية + خيزو + اللفت اختياري + الربيع مقبط
الحمص يطيب بوحدو مع الملح و شوية السمن و عود القرفة و شوية عطرية اللحم
نحضر الكسكس
و في التفويرة الاخيرة نضيف للكسكس الابزار و الملح و الزيت عود و السمن اختياري
و نضيف للبرمة العكرعة حمرا و مطيشة وحدة محكوكة و شوية الملح و الابزار و السمن اختياري و عطرية اللحم
نعسل البصلة تفاية هي و الزبيب
نحط الكسكس ونحط الكتف و خيزو في الجناب و الكرعة و الحمص و التفاية









التفاية - هدى اليداري
كيلو بصلة بيضاء مشفرة رقيقة + ربع كاس زيت + ربع م ص السمن + ملح + عود قرفة + نص م ص عطرية اللحم و تشحر مزيااان حتى تدبل مع التحراك تقريبا نص ساعة على نار مهيلة + 5 دراهم او حفنة زبيب يكون قبلا في ماء مغلى مع الزهر +راس م ص االقرفة + 2 مسكة حرة ونغطي الطنجرة و نخليها تعلك مللي تقرب طيب + 2 م ك سنيدة و نخليها تعلك .... اخر شيئ ممكن نضيف حفنة اللوز محمر في 2 م ك زيت بالقشرة ويتهرمش -اختياري -






اللحم مبخر - هدى اليداري
نشرملو اللحم من العنكرة او السنسول او الكتف و يتشرمل بالثوم غبرة او بثوم واحد محكوك + بصلة غبرة + ملح + نص م ص قزبر يابس + 2 م ك زيت زيتون + نص م ص كامون + شوية قزبر يابس ونتقب اللحم مزياان و نخليه مشرمل ساعتين على الاقل و ندير يتبخر في برمة تكون مغطية بالميكة و الما ديال البرمة يكون فيه الربيع مقبط و بصلة مقطعة على 4 و حبة مطيشة مقطعة على 4
مللي يتبخر ندهنوه بالخليط التالي :
بنص م ص السمن مع م ك الزبدة + ربع م ص كامون + شوية قزبر يابس + نص م ص باربكيو + ملح + شوية ثوم غبرة و نعجن الخليط و ندهن بيه وندخلو الفران
يكون مرافق للخضر مبخرة ومشرملة بنفس المكونات معاه و مشحرة مع زيت العود او زبدة و ملح و باربكيو










اللحم محمر – كيلو – هدى اليداري
ناخدو اللحم و نشرملوه في نصف كاس الما في بانيو + نص م ص ثوم غبرة او 1 ثوم صغير + 2 عواد القرفة + 2 تمرات بلا عظم + م ص عطرية اللحم + خرقوم بلدي + زعفرا شعرا + 2 مسكة حرة + م ك سكينجبير + ربع م ص ابزار او اقل + م ص السمن + م ك بودرة اللوز ونشرملو ونخليه راقد اكبر مدة ممكنة
من بعد كنديروه في الطنجرة و كنخليه يتشحر مدة نصف ساعة على نار مهيلة
ونقلب مرة مرة + كاس الا ربع زيت و نحك فيه بصلة كبيرة ونخليه يتشحر مازال ربع ساعة حتى 20 دقيقة حتى يتشحر مزيااان ونضيف 2 كاس كبير الما مع املح ونغطيه ونخليه يطيب على راحتو
من بعد ما يطيب نعسلوه ب م ص العسل و شوية عطرية اللحم و زعفران حر و 2 مسكة حرة و قبصة السمن و ندخلو الفران فوق ورق الطهي
مللي يخرج نرجع نردو للطنجرة شوية ونخليه يتدغمر نصف ساعة نار مهيلة
ونزوقو من الفوق باش ما بغيت




طريقة تحضير الكلاوي – هدى اليداري
بصلة كبيرة مشلظة رقيق مع 2 ثوم و الزيت و تشحر حتى تدبل قبل ما تولي مارو ومن بعد نضيف الكطلاوي مشرمل ب
الربيع + نص م ص طحميرة + نص م ص كامون + نص م ص عصير الحامض + م ك زيت عود +ملح + ربع م ص عطرية اللحم + ربع م ص قزبر يابس
ونضيفو على البصل بلا ما نحرك و نغطي الطاجين و نخليه 10 دقايق على نار مهيلة ومن بعد نحرك شوية و نضيف زيتون اخضر و الحامض مصير و نغطيه 10 دقايق اخرى و نقدمو




طريقة تحضير الطحال - هدى اليداري
طريفات اللحم مع شوية الشحمة مقطع رقيق في مقلة مع م ك زيت العود و ضرس الثوم و بصلة محكوكة و طحميرة و ابزار و هريسة وملح و م ص عصير الحامض و قزبر يابس و تشحر مزيااااان و في الاخير نضيف الربيع ونخليه يبرد و نضيف الزيتون مقطع اختياري
الطحال نحلو من الراس ونعمرو ونخيطو ونتقبو بالقطيب وندخلو الفران او في الشواية



القديد - هدى اليداري
ناخد 2 كيلو اللحم ونقددو يعني نديرو على شكل طولي و نفلحوه و نشرملوه بكركوبة من الثوم بالقشرة مدقوق او مطحون و 2 م ك الملح + 2 م ك قزبر يابس + م ص كامون + 2 م ك زيت العود + نص كاس صغير خل صحراوي او م ك خل عادي
وممكن اضافة أي ملون سواء خرقوم او طحميرة ونخلط ونخليه ليلة كاملة في الثلاجة مغطي ونطلعو للسطح 3 ايام و نحيدو بالليل



طريقة تحضيري المخ – هدى اليداري
في طاجين نحك 3 مطيشة بالزريعة مع زيت عود + 2 ثوم + م ص الربيع + ملح ونشحرها على نار مهيلة ومللي طيب و تعلك وما يبقاش فيها الما + م ك مطيشة الحك مخففة في نص كاس صغير الما ... ونخليها تشحر
ونشرمل المخ من بعد ما قطعتو مربعات ب م ص الربيع + نص م ص طحميرة + نص م ص كامون + م ص عصير الحامض + ملح + م ص زيت زيتون + ربع م ص قزبر يابس و شوية عطرية اللحم و نشرملوه مزيااان و نحطوه فوق مطيشة و ما نحركوش حتى يقبط في راسو وعاد نقلبو بشويييية .


طريقة تحضير الفولات - هدى اليداري
اولا نقيو الفولات : نحيدو القشرة الاولى و الثانية
نغسلهم ونقطعهم مربعات و نديرهم في الطاجين ونشرملهم بالربيع و 2 ثوم ونص كالس زيت عود و نص م ص عصير الحامض و ملح و طحميرة و راس م ص مروزية و ربع م ص عطرية اللحم و ربع م ص كامون و هبرة ربع حامضة مرقدة مغسولة و نخليه يطيب على نار مهيلة 10 دقايق تقريبا او اكثر بقليل و في الاخير مللي ينشفو من الما + زيت العود و الطحميرة و نغطي الطجين 5 دقايق اخرى






المروزية - هدى اليداري - المدرسة
2 كيلو اللحم او الملوجة ديال البيبي
في بانيو : كاس عنبة ديال الما + م ص المروزية + نص م ص عطرية اللحم + 2 تمرات بلا عظم + نص م ص بصلة غبرة + 2 عواد القرفة + زعفران حر + م ص السمن + ربع م ص ابزار + م ك سكينجبير + ملح + م ك بودرة اللوز و يتشرمل مزيااان و نخليه راقد اكثر من ساعتين
من بعد ندير يتشحر على نار مهيلة 20 دقيقة او نص ساعة و نضيف عليه بصلة و لا 2 بيضاء مشلظة و مشحرة من قبل مع الزيت بوحدو او كيلو ايلا درنا مروزية الدجاج اة بيبي حتى تدبل شوية + زلافة صغيرة الزبيب + 2 كاس عنبة الماء + نص كاس عنبة زيت رومية
ونخليها تطبخ على نار مهيلة ساعة او اكثر حتى يطيب اللحم
مللي يطيب نضيف نص كاس عنبة او اقل شوية ديال السنيدة + م ص السمن و نردها تطبخ باش تختر و نغطي الطنجرة غير من النص . مدة ساعة تقريبا .
تزين عند التقديم باللوز