دايما متالقة مشرفتنا في طرح مواضيع مفيدا شكرا لك
إليك باقة متنوعة من النصايح
*
اليوم في حديث ومغزل مع سناء الزعيم قدمو لينا المستمعات مجموعة الأفكار لتلميع الأحذية وهذه الأفكار :
*فاطمة من تازة : كتحكي الحامض و في الجلد يترك قليلا ثم يمسح بمنديل نقي و جاف .
الحذاء ديال الدان: يمسح بالماء ديال القهوة .
* فاطمة من الرباط : السباط ديال الدان التخت ديال القهوة .
- الزيت الرومية نقطة في زيف ثم تمسح مرة أولى و مرة ثانية بمنديل نقي حتى تلمع و هاد الطريقة صالحة لكل أنواع الجلد.
ليوم في حديث ومغزل مع سناء الزعيم قدمو لينا المستمعات أفكار لتنظيف الرخام و هذه هي :
* حفيظة من وجدة : نحكو الرخام بمسحوق الصابون و نشللوه بماء معصر فيه الحامض ثم ندهنوه بشوية الزيت و نمسحوه مزيان .
* حنان من البيضاء : الماء الساخن في سطل فيه الصابون البلدي نذوبوه ثم نخويو هاد الماء و نحكو بالشيتة ثم نسيقو مزيان و نعاودو بالجفافة فيها غير الماء .
اليوم في حديث و مغزل مع سناء الزعيم اقتارحو علينا المستمعات طرق لازالة الخملة عن الزربية و هذه بعض الأفكار :
* سميرة من البيضاء : ندوزو بزيف فازك بالماء ديال مشروب غازي حتى تهز الخملة ثم نشيتو بشيتة مفزكين راسها شيشوية.
* عزيزة من البيضاء : بانيو فيه الماء و مسحوق سائل ، نفزكو شيتة شوية و نشيتو مزيان الزربية ثم بفوطة نفزكوها بنفس السائل و نعصروها و نبداو نمسحو بها بحال ايلا كتجفف السيدة الأرض .
اليوم في حديث ومغزل قدمو لينا المستمعات مجموعة من الأفكار لتنظيف البلاكار و هذه البعض منها :
* حسناء من مكناس : 3 معالق من الخل و 3 معالق من الزيت الرومية نخلطوهم و نديروهم في منديل و نمسحو بهم مزيان .
* زهور من فرنسا : نمسحو البلاكار بالصابون البلدي ثم نخلطو البيكاربونات الصودا بالماء ثم نعاودو نمسحو بهم البلاكار.
* نعيمة من بني ملال : مسح البلاكار بماء الجافيل و منديل .
و بالنسبة للفرن فينظف ب :
* في كل مرة نطفئ الفرن نرشوه بالخل اللي غادي نوضعوه في رشاش ونخليوه مدة 15 دقيقة على الزجاج وهو سخون ثم نمسحوه .
* فاطمة الزهراء من سلا : ندهنو معجون الأسنان على زجاجة الفرن حتى ينشف ثم نمسحوه بزيف ناشف .
- و بالنسبة للزليج ديال الكوزينة : فنحكوه بالصابون البلدي مزيان ثم نمسحوه بزيف ناشف.
اليوم في حديث ومغزل مع سناء الزعيم قدمو لينا المستمعات مجموعة من الأفكار لتنظيف الفضة و هذه البعض منها :
* حسناء من البيضاء : الصابون البلدي ندهنو به الفضة ثم نمسحو بالقطن جيدا ثم نغسلوها و نمسحوها مزيان حتى تنشف.
* مليكة من اسفي : نحكو الأواني بالحامض ثم نشللوهم بالماء و نمسحوهم بزيف ناشف.
* فاطمة الزهراء من وجدة : الرماد نعصرو عليه الحامض ثم نحكوه به .
اليوم في حديث ومغزل مع سناء الزعيم قدمو لينا المستميعات بعض الأفكار لتنظيف الثريات و هذه أهمها :
* أمينة من وادزم : نخلطو الماء المعدني مع الخل و نمسحو بمنديل الثريات .
- ممكن أيضا خلط الفازلين مع الزيت الرومية ونمسحو بهم الثريات .
* مباركة من خنيفرة : بطاطا خضراء نحكوها في الصفاية الرقيقة و نضيفو الماء ثم نمسحو به الثريات.
اليوم في حديث ومغزل مع سناء الزعيم قدمو لينا المستمعات مجموعة من الأفكار لتنظيف الطلامط و هذه هي:
* أمينة من الصويرة : نعصرو الحامض و نخويو شوية من مشروب غازي أسود ثم نفركو الطبعة بالصابون.
* حليمة من قلعة السراغنة : ناخذو التخت ديال القهوة و نشللوه بعصير الحامض و نوضعوه فوق الطبعة و نخليوه 5 دقائق ثم نحكوه بشيتة و نشللو بالماء.
* فاطمة من تمارة : ندهنو الطبعة بمعجون الأسنان و مشروب غازي مدة 20 دقيقة ومن بعد نفزكوها بصابون الحجرة ونشللو بالماء.
اليوم في حديث ومغزل مع سناء الزعيم قدمو لينا مستميعاتنا مجموعة من الأفكار لازالة الطبايع من أغطية المائدة وهذه البعض منها:
*نهال من وزان : نوضعو الطحين ديال الذرة على الطبعة ثم نفزكوه و نخليوه ربع ساعة ثم نغسلوه بالصابون ديال الحجرة وممكن استعمال هاد الوصفة للجلابة أيضا الا تطبعات.
* مليكة من تطوان : تدهن الطبعة بمعجون الأسنان لمدة 10 دقائق ثم تفرك باليد و الصابون ديال الحجرة .
* حبيبة من العيون : نفزكو الطبعة و ندهنوها بالصابون البلدي و يبات بلا ما نفركوه و من بعد ننظفوه بصابون الحجرة .
* ابتسام من مراكش: نرقدو الملابس في الحليب ثم نحكو الطبعة بالصابون ديال الحجرة و نفزكوه مزيان ثم نشللو بالماء.
اليوم في حديث ومغزل مع سناء الزعيم قدمو لينا المستمعات مجموعة من الأفكار لتنظيف "الروبينيات" ديال الحمام و هذه بعض الأفكار :
* جنات من الصويرة : نحكو الروبيني بنصف حامضة مع الملح ثم نحكوه بالحلفة ونغسلوه و نمسحو في الأخير بالصابون و نغسلوه.
*أمينة من الدار البيضاء : نمسحوه بالحامض و نخليوه ربع ساعة ثم نحكوه بجيكس و الصابون ديال الأواني و نشللوه .
* ليلى من المحمدية : الصابون البلدي و نعصرو عليه الحامض ثم نحكوه بالجيكس في الأول ثم بالحلفة العادية و مسحوق الغسيل و نغسلوه
اليوم في حديث ومغزل مع سناء الزعيم قدمو لينا المستمعات مجموعة من الأفكار لتنظيف الزربية من الطبايع وهذه بعض الأفكار :
* هند من مراكش // الحجرة ديال الصابون و نحكوها مباشرة على الطبعة ديال الزربية ثم نديرو عليها الملح الغليظ و نشطبو الزربية بحيث كتزول كل الخملة.
* حنان من فرنسا : في زيف نبللوه بالخل والليمون ونمسحو الطبايع مزيان .
* رحيمة من تطوان : خنشة ديال الدقيق خاوية و نفزكوها بشوية من المنظف اللي كتستعمل كل سيدة ثم نمسحو بها أماكن الطبايع بالزربية
اليوم في حديث ومغزل مع سناء الزعيم قدمو لينا المستمعات مشكورات مجموعة من الأفكار لتنظيف النباتات الاصطناعية وهذه أهمها :
* فاطمة الزهراء من وجدة : زيف أو قطن نضيفو ليه الخل ثم نمسحو به النباتات الاصطناعية.
* حنان من خنيفرة : بيكاربونات الصودا مع روح الخزامى أو قطرات الحامض في الماء دافئ و نمسحو بمنديل أو نحكو بشيتة ديال الأسنان.
* أمينة من البيضاء : منشف الشعر و نديروه على النباتات بحيث كيطير الغبرة اللي داخل الأوراق و اللي من الصعب الوصول ليها ثم ناخذو القطن و نديرو فيه شوية ديال فازلين و نمسحو به الأوراق حتى يلمعو.
اليوم في حديث و مغزل مع سناء الزعيم قدمو لينا مستمعاتنا مجموعة من الأفكار لتنظيف الكؤوس المستعملة يوميا للشرب و الشاي و القهوة للحفاظ على نقاوتها و لمعانها و كذلك رائحتها وهذه هي أهم الأفكار :
* زهرة من الدار البيضاء : نغسلو الكيسان بمسحوق الغسيل و جافيل و نشللوهم بماء فيه الخل و نديروهم يقطرو بلا ما نمسحوهم بالزيف و كتبقى رائحتهم زوينة .
* سعيدة من مكناس : نرقدو الحامض بماء دافئ مدة نصف ساعة ثم نضيفو مسحوق الغسيل لهاد الماء و نغسلو الكيسان ثم نشللوهم بماء ضفنا ليه ملعقتين من ماء الخزامى اللي غادي نكونو سبق لينا و طبخناها من قبل ثم نخليوهم يقطرو ، و هاد الوصفة كتحافظ كذلك على يديكي سيدتي .
ليوم في حديث و مغزل مع سناء الزعيم قدمات لينا المستمعة الوفية للبرنامج زكية من مدينة الدارالبيضاء طريقة سهلة لتقطار الحلبة بالمنزل و اللي كنحتاجو ليها الحلبة طرية (أوراق) ثم نخليوها في الحرارة العادية ديال المطبخ و ناخذو الأوراق ديالها و نديروهم في القطارة ديال القهوة و نخليوها تقطر بحيث كتعطينا عصارة ديال الحلبة و هادي أسهل طريقة لتقطار الحلبة بالمنزل و اللي ممكن نستعملو الماء ديالها في الطهي بحال الكسكس و الرفيسة و غيرها من الاستعمالات و بهذه الطريقة ممكن حتى الأطفال يتناولوها بدون الهروب من الرائحة أو الطعم.
وأكد لينا الدكتور عماد ميزاب على أنه بنفس الطريقة ممكن نقطرو الأعشاب ذات الزيوت الطيارة بحال أزير اللي عندو منافع فهو مضاد للبكتيريا ومشاكل الجهاز الهضمي ، الزعتر الجيد للهضم و مشاكل المعدة و كذلك مضاد للزكام ، فليو و النعناع الفليوي فهما جيدان لنزلات البرد و لكن يجب تفاديهم بالنسبة للناس المصابين بالربو أو الضيقة.
اليوم في حديث ومغزل مع سناء الزعيم قدمو لينا المستمعات مجموعة من الأفكار لتنظيف ابريق الحليب أو الطيرموس وهذه هي الوصفات:
*لبنى من الراشيدية : نغسلو الابريق عادي ثم نعمروه بالماء و قطرات ديال الخل و نخليوه شوية ثم ناخذو ثوب حياتي و نخويو فيه خنشة ديال الفانيلا و نخليوها بداخله.
* رقية من أكادير : نغسلوه بالمسحوق ديال الغسيل و نعصرو فيه الحامض ونخليوه شوية ثم يتغسل مزيان.
* أمينة من الدارالبيضاء : نغسلوه بالمسحوق و نحكوه بالشبكة الطويلة من الداخل ، ثم ناخذو فتات القهوة ويتسد عليه ويتمخض ثم نوضعو فيه كميشة فيها حبات القرنفل وطرف من السكر و نخليوه في الطيرموس .
الثلاثاء سبتمبر 19, 2017 1:39 am من طرف 
موضوع: تجميع نصائح التنظيف والتنظيم المنزلي في الحياة اليومية من برنامج حديت و مغزل مع سناء الزعيم على أصوات 
