وصفات ميد راديو ليوم
23mai2O11
جمال ميد

فالجمال اليوما سناء تكلمات على تشقق الشفتين عطات معلومات كتيرة جدا ومنضمة ومنسقة

تابعوني

-طبيعة الشفتين كتكون مختلفة على حسب نوعية البشرة ديال الوجه
-لابد من الابتعاد على عض الشفتين باعتبارها عادة سيئة
-مسح الشفتين بفوطة مبللة بما دافي ونعملو كريم مرطب تم نعملو كوماج بالقطن وهكدا نكونو زولنا الخلايا الميتة اللي فالشفتين
-دهن الشفتين يوميا بمرطب فحال وبدة الكاكاو اللي كيتباع على شكل احمر شفاه فالفارماسي
-عصير الحامض وزيت الزيتون ندهنو بيه الشفتين مزيان من بعد نكومبو بالقطن المبلل بالما دافي
-يمكن ندلكو الشفتين بزيت الورد لترطيبها
-يمكن نعدلو احمر الشفاه فالبيت بمزج الفازلين مع عكر فاسي هاد الوصفة كترطبهم وتعطيهم لون وردي
-نضفو ديما الشفتين من العكر و نعملو ما الورد
-لحماية الشفتين من التشقق نكترو من شرب الما لانو مهم بواف
-دهن الشفتين يومبا تلات مرات بزيت اللوز او الورد او الزيتون خاصة بالليل
-كدلك ممكن كل ليل دهن الشفتين بفازلين ونضفو بقطن مبلل
-اللي كيعاني من تشقق كبير فالشفتين ندفيو فازلين تم نخلطوها مع زيت اللوز او الورد او الزيتون بتلاتة مزيانين ونعملو الخليط كل ليلة حتى الصباح عاد نضفو او اكتر من نصف ساعة بالنهار
-يمكن ندهنو يوميا بزيت النعناع لانو مفيد كيحمي القشرة الخارجية للشفتين ويرطبها

شهيوات ميد

حلوة اعياد الميلاد

المقادير
200 غ وبدة
150غ شكلاط الحلوة
100بدرة كاكاو
7بيضات
250غ سنيدة
قبيصة ملح

التزيين كريم شانتيلي فيرميسيل شكلاط
الطريقة
ندوبو الوبدة وشكلاط على عافية مهيلة نضيفو لها بدرة الكاكاو ونحتفظو بالخليط
نضربو ابيض البيض مع الملح وتسعين غرام سنيدة حتى يطلع ثلج
وفاناء اخر نضربو الاصفر مع السنيدة اللي بقات ونضيفو لو خليط الكاكاو ونخلطو جيدا تم نضيفو ابيض البيض مع التحريك من اسفل لاعلى باش مايتكسرشاي
من بعد نوجدو المول ديالنا ونعمل فيه تلتي الخليط والتلت الباقي فالتلاجة نسخنو الفران على 180ونخليوه ينضج الى نصف ساعة تقريبا خمس وعشرين د
نخرجو من الفرن نخليوها تدفا تم نضيفو لها التلت النتبقى نمرروه بالسباتيل تم ندخلو اللكل للفرن مدة عشرة دقايق تقريبت حتى لخمس عشر
منين نخرجوها صافي الحلوة وجدات نعملو عليها الشكلاط دايب بحيت نغطيوها كاملة تم نزوقو بالكريم شانتيللي سواء نكتبو بيها او نعملو وريدات اللي حبينا وفالجناب نزوقو يا اما بالفيرميسيل او الشكلاط محكوك

فوائد لافوكا

سناء تكلمات كتير علىى هاد الفاكهة اللي كتعتبر غنية بزاف و كتستعمل فميدان الجمال كدلك بكترة الا ان احتواءها على نسبة دهون وسعرات حرارية كتيرة كتخلي اصحاب الريجيم من الضروري يبعدو عليها
هي كتنشط الكبد كتقي من سرطان الامعاء من الكلسترول كتنضف الامعاء ومفيدة للرياضيين والطفل ففترة النمو
بالنسبة للتجميل فهي غنية بالفيتامين e الضروري لتجديد الخلايا كتحمي من الترهلات وكتنشط الدورة الدموية
للوجه نعملوها مع العسل الحر
للجسم نعملو مساج بيها بوحدها
للشعر نعملو بيها ماسك

وصفات المستمعات

~~خديجة من الراشدية

عجينة البيتزا

زلافة طحين شوية خميرة الدار ملح زعتر تعجن موزيان بالما دافي وتدلك من بعد نضيفو شوية زيت العود ونعاودو نعجنوها نخلوها ترتاح تم نبسطوها نتكوها بالشوكة ونعملو الصلصة التالية هات الصلصة كتعطيها مداق رائع ولا المطاعم: زوج مربعات فروماج مع زوج معالق حليب تخدم مزيان الى ان نحصل على قوام كريمي صافي ندهو بالكريما تم نعملو الصوص ديالنا عادي والحشوة والى الفرن

كريم لتزيين الحلويات كتجي كيف الشانتيلي

125غ زبدة نباتية تضرب جيدا مع كاس صغير زيت وكاس سكر كلاصي حتى تطلع مزيان تم نضيفو لها دانون فاني وكاس الحليب بالتناوب حتى نحصلوو على القوام الكريمي

طحال فالطنجرة

نحلو الطيحال من الجنب ونعمروه بالكبدة وقزبر ومعدنوس والتوابل نعملوه فالكوكوت ونعملو معاه كاس زيت نخلوه نصف ساعة
من بعد مايكون طاب نقطعوه مولاسويات نعملوها فالبيض ولاشبلير والى الفرن اما المريقة اللي طلق فالكوكوت فكتقدم مرافقة

~~سهام من الدار البيضاء

كاشير

5م سميدة رقيقة 200غ كفتة الدجاج كنور الدجاج شوية ملح شوية ابزار زوج ضرزس توم شوية قصبر ومعدنوس زيتون مقطع يخلط الكل جيدا نوضعو فبلاستيكة او الاناء الخاص بالكاشير والى الكوكوت من نصف ساعة الى ساعة الا ربع

فروماج

65غ حليب غبرة فرماجة 125غ وبدة عبار عصير حامضة صغيرة حليب كامل الدسم نخلطو الزبدة فمولينكس مع الحليب وحليب غبرة ونضيفو الحامض شوية شوية حتى نضبطو المداق

~~فاطمة الزهراء من الدار البيضاء

هاد الوصفة طلبوها المستمعات بزاف وتم ادراجها للمرة التانية نضرا لفعاليتها
وصفة كتقلل الشعر
الشبة الصيبر التارة موستيكة ندقوهم ونعملوهم فوق النار تلات دقايق بلاما بلا والو منين نعملو لاسير نعملو الكريم تم نعملو مساج بهاد الخليط على شكل دائري
الاستعمال الاول كيقلال الشعر التاني اما التالت كيكون فرق كبير جدا

تبريمة الوجه
زوج كيلو غاسول
زوج دراهم من كل مادة من المواد التالية ازير ورد خزامى بابونج زعتر قرنفل سنبل ريحان
نعملوهم يباتو ليلة كاملة فلتر ما طايب ماعدا الغسول اللي غادي حتى هو يتعمل فما طايب بوحدو
من بعد نضيفو الخليط على الغسول و نخليوه ينشف او يتسيق
من بعد نوليو ناخدو منو شوية ونعملوه مع عكر الفاسي والحامضي بعد كمانساليو الحمام

~~ام زينب من الرباط
موس بالحامض
زوج ياغورت مسوس 100غ سنيدة زوج ابيض البيض علبة قشدة طرية قشور وعصير حامضة
نطربو ابيض البيض
نطربو واحد ياغورت مع سنيدة وواحد مع القشدة و نضيفو لو عصير حامضة وقشورها
ندخلو ابيض البيض بالسباتيل من تحت لفوق ونخليو الخليط يبات ليلة كاملة
يتقدم فكؤوس مع سكر محكوك او حسب الدوق

صوص شوارما
تلات ضروس توم
نص كاس طحينية كتباع فمحلات اللي كتبيع المواد الشؤقية ولا المحلات الكبري
قزبر مقطع
ربع كاس ما مغلى
يطحن الكل فالميكسور

~~ايمان

الريحة الخايبة فالتلاجة نعملو زوج طبيسلات فيهم الفاخر واحد فوق واحد تحت
باش ريحة اللحم مفور ماتعطيش نعملو معاه بصلة

~~حرية

وصفات البشرة الجافة

اولا البشرة الجافة مرة تغسل بما دافي مرة بارد
بعد الغسل والوجه فازك نعملو زيت ورد لوز اركان باش تحتافض بيه البشرة

هدا ماسك للبشرة الجافة
تلات معالق عصير برتقال تلات معالق زيت المشماش معلقة كبيرة درة مطحونة ماشي النشا ولكن نجيبو الدرة ونطحنوها ونردو بالنا من المواد اللي فيها مواد حافضة لانها اي نعم كتعطي نتيجة بصح مستقبلا كتاتر اما الى كانت البشرة دهنية عصير البرتقال نعوضوه بعصيرالحامض
-البشرة الجافة مع بقع لابد من مداومة القناع التالي معلقة قشور رمان مطحونة مع معلقة عسل حر مع عصير حامضة وشوية زيت اللوز الى كانت البشرة ماشي جافة بلاش من الزيت

~~خالتي كنزة
وصفة فعالة للطياب د الدراري زيت قلي البطاطا
وصفة للغلض
نص رابعة كركاع رابعة زنجلان محمر مطحون نص كوزة كاس عسل حر زوج بكيات بسكوي نطحنوهم ونجمعو بالعسل والى بقا جاري بزاف نضيفو ربيع كاس زيت العود
تاخديهم منين تبغي تنعسي زوج معيلقات مع حليب او شاي او لويزة

تساقط الشعر

الحرمل حديدة حمرا خمس دراهم ونعملةها فالعجينة لويوها عليها وندخلوها فران من بعد ندقوها فالمهراس هي والحرمل ونخلطوها بزيت العود