المول أو صينية الفرن من الأفضل نعملو فيها ورق الطبخ وندهنو الجناب بالزبدة أو الزيت ونرشوهم بالدقيق
نجاح أي جينواز متوقف على المرحلة الأولى لي هي تطراب البيض مع السكر وكذالك درجة حرارة البيض هادي كتلعب دور فقط في وقت التطراب
يعني إدا كان البيض من الثلاجة غادي تنجح لنا الجينواز لكن غادي تاخد وقت أطول في التطراب
إدا بغيتو تعملو جينواز وعندكم البيض بارد تقدرو تعملوه في شوية د الما دافي على ما توجدو باقي المقادير
الفرن يكون مسخن من قبل على 180 درجة مئوية وغير تطيب الجينواز نخرجها لانها إدا بقات وقت طويل كتقصاح وترجع بحال البيسكوي
ملاحظة : الإرتفاع ديال الجينواز مرتبط أيضا بحجم المول أو القالب المستعمل
يعني بغيت بنفس هاد المقادير تجيني جينواز عالية بزاف نعملها في مول أصغر من هذا
والعكس صحيح بغيتها تجيني رقيقة نعملها في مول أوقالب أكبر
سواء بغيت الجينواز تكون أكبر أو أصغر من هاد القياس كننقص أو نضيف لكل بيضة 30 غ من السكر و الدقيق
يعني إدا بغيت ننقص مثلا غادي نعمل 5 بيضات + 150 غ سكر + 150 غ دقيق
أو بغيت نزيد غادي نعمل 7 بيضات + 210 غ سكر + 210 غ دقيق
بالنسبة للنكهة ممكن تنكهو ببشر الليمون الحامض او البرتقال أو الفاني أو روح اللوز كيبقى المجال مفتوح أمام ذوقكم
الثلاثاء سبتمبر 19, 2017 1:39 am من طرف 
موضوع: نصائح لنجاح الجينواز 
