حبيباتي اليوم غادي نوريكم طريقتي ديال لمسمن رائع بمعنى الكلمة كيجي مورق ورطب بزاف و خا كيصبح كيبقا رطب ماشي بحال ديال الزبدة فيساع يقصاح وكيقتل المعدة .
مسمن رائع مورق بدون زبدة
المقادير هي
* 2 زلايف فورص ممتاز
 + 2 زلايف قمح ممتاز
 + شوية الملح
 + شوية السنيدة 
+ شوية زيت العادية 
+ شوية لخميرة حبوب
 + 1 خميرة حمرة
الطريقة هي 
كنخلطو المقادير كاملة ونعجنوها مزيان وتبقى مرخوفة وناخدو زلافة ونعمروها بزيت العادية وشوية زيت الزيتون زيت العادية تكون غالبة على زيت الزيتون ونخلطوهم مزيان حتى يندامجو وهدا هو سر توراق بلا زبدة غير بهاد الزيوت بجوج وندهنو بها العجينة ونخليوها ترتاح 15 دقيقة ثم نقطعوها الى كويرات متوسطة حسب الرغبة ونبداو نورقوهم بزيت لخلطنا ونطويوهم عادي حتى نكملو الكمية كاملة ونبداو نطيبوهم في طيفال مدهونة بنفس الزيت لورقنا بيه غير نحطو لمسمنا غير شوية ونقلبوها في نفس الوقت باش تنفخ وتجي رطبة ومورقة هادشي بنسبة للمسمن العادي ونفس لمسمن كنعمرو بطون كيجي غزال نخليكم مع الحشوة .