سنفرة الجسم ممكن نعملها كام مرة في الأسبوع؟
ممكن تعملي سنفرة لجسمك مرتين في الأسبوع، ودي بالطرق الطبيعية اللي قلنا عليها، ده بالإضافة إلى السنفرة المغربية، ودي ممكن تستخدميها من مرتين إلى ثلاث مرات في الأسبوع، والصابون المغربي ممكن تستخدميه كل يوم لتنعيم وإزالة الحبوب من الجسم كله.
هل صابونة الرز ممكن تغني عن الشاور جل؟
آه طبعا ممكن تغني.. وبتستخدميها كل يوم زي الشاور جل بالضبط، وخلّي بالك لأن فيه بعض أنواع الشاور جيل بيعمل اسمرار للجسم، الشاور الجيل الصحي هو اللي ملمسه ناعم ومش بيعمل رغوة كتيرة.

إيه الروتين اللي ممكن نتّبعه لتنعيم الجسم؟
أولا بتغسلي جسمك كل يوم بالشاور جل أو صابونة الرز أو الصابون المغربي، وبعد كده بتستخدمي كريم مرطّب زي الجليسوليد أو دوف أو نيفيا، وخلّي بالك إنك ماينفعش تستخدمي لوشن فازلين مع الكريم المرطب؛ لأن لوشن الفازلين بيعمل ترطيب عالي جدا للبشرة.

هل زيت اللوز المر بيفتّح الجسم؟
زيت اللوز المر بيفتّح بشرة الجسم والوجه.

هل ممكن نستخدم ماسك جوز الهند والجلسرين للإيدين؟
ماسك زيت جوز الهند والجلسرين ممكن نستخدمه لمدة شهر وبعدين نغيّر ونستخدم مرطبات تانية، كمان لوسيون البرتقال والليمون ليه نتائج مذهلة على البشرة.

عايزة وصفة للشعر المقصّف الضعيف والخفيف؟
اعملي خليط من كميات متساوية من زيت الجرجير وزيت جوز الهند وزيت الثوم، والخليط ده بتستخدميه للجذور بس؛ لأن أي حاجة فيها ثوم بتبقى على الجذور بس، وممكن على أطراف الشعر تحطّي حمام كريم أو أي بلسم لمدة ربع ساعة إضافة إلى الماسك.

وتقدري كمان تعملي ماسك عبارة عن موزة مضروبة في الخلاط، معاها بيضة كاملة وعليها ملعقة حمام كريم أو بلسم وده لتغذية الأطراف، والمهم تداومي على قص أطراف الشعر مرتين في السنة.

عايزة أعرف كبسولات فيتامين E ممكن نستخدمها إزاي؟
ممكن تحطّي كبسولتين على علبة كريم نيفيا من الحجم الصغير، بس خلّي بالك إن كبسولات فيتامين E بنستخدمها للبشرة فوق سن الـ35.
 
إزاي نفتّح بشرة الرقبة؟
أي ماسك للرقبة عملناه في الحلقات اللي فاتت بيدّي روقان للرقبة، كمان أي ماسك لتفتيح بشرة الوجه ممكن نحطه على منطقة الرقبة.

إيه هي الطرق اللي ممكن تساعد على إزالة الدهون في البطن والأرداف والجوانب؟
ممكن تغلي كمون مع الليمون وتشربيهم على الريق، والخليط ده بيعمل على إذابة الدهون، ولو عايزة تنزّلي منطقة الجناب ممكن تعملي كوكتيل من البقدونس والكرفس بإنك تنقعيهم في ميه سخنة وتشربي الميه بتاعتهم.

ممكن أجيب النخاع منين؟
النخاع بتلاقيه عند محلات الجزارة أو في أي سوبر ماركت كبير.

إيه أفضل الطرق لإزالة الشعر من الوجه.. السويت ولا الشمع ولا الفتلة؟
يفضّل الفتلة؛ لأن السويت بتعمل تجاعيد والشمع أقل ضررا، وممكن تعملي ماسك الترمس وده بيعمل على إزالة الشعر من الوجه مع الوقت، وده بتعمليه بإنك تغلي 2 فنجان ترمس بلدي مر مطحون مع ½ لتر ميه، وبتحطّي من اللوسيون ده بشكل يومي على بشرتك.

إيه أفضل ماسك لمشكلة حبوب البشرة؟
ممكن تعملي ماسك عسل النحل مع الخميرة الطبيعية لإزالة الحبوب، وبتعمليه يوميا لمدة من عشرة أيام إلى شهر، وممكن تستخدمي الخميرة الأقراص اللي بتتباع في الصيدليات.

عايزة ماسك لتطويل الشعر؟
زيت الجرجير وزيت اللوز، وأي حاجة بتستخدم للتغذية بتطوّل الشعر، ولو عايزة حاجة أسرع ممكن تستخدمي زيت الآس مع زيت الحشيش وزيت الثعبان بمقادير متساوية، لتطرية وإطالة الشعر بشكل أسرع.

إيه هو دهن الورد؟
دهن الورد هو زيت الورد وهو مفيد جدا لبشرة الجسم.

إيه هي الأكلات اللي بتساعد على التخسيس؟
الكرفس الطازج وشوربة الكرنب من الأكلات اللي بتساعد على التخسيس، بالإضافة إلى ممارسة الرياضة وتناول وجبات صحية.