السلام عليكم و رحمة الله تعالى و بركاته

أخواتي الغاليات المنتظرات أولا الله يسهل على كل وحدة بالذرية الصالحة و الله لا يحرم شي امراة في هذا الكون من نعمة الامومة يا ربي

غادي نعاود لكم قصتي من الأول و بالتفصيل باش تستافدو مزيان و اللي عندها شي سؤال مرحبا بيها

أنا كنت دايرة اللولب النحاسي لمدة تفوق سنة و الحمد لله كنت مرتاحة عليه ,
من بعد لما قررت نحمل مشيت زولتو قالت ليا الطبيبة بأنه ممكن يوقع حمل
فنفس الشهر حيث الخصوبة تترجع بالزربة و ممكن يتعطل حتى لـ 5 شهور حتى
يتنظف الرحم من بقايا اللولب و ما الى ذلك , و قالتليا بداي من دابا تشربي
Folic acid , المهم مللي زولتو جلست 10 ايام موراها و جاوني ليغيكل
العاديين لأن السيكل كان عندي منتظم الحمد لله و واحد النهار دخلت كنقلب
على شي وصفات لتنظيف الرحم بالزربة و تيخرج ليا شي اعشاب ما عرفتهومش و شي
عشوب ما يمكنش نلقاهم هنا فاوروبا و هالحلبة ها حب الرشاد ها المرة ها عسل
الدغموس المهم داكشي كثير بزااف و ما عنديش منين نجيبو هنا , و انا ندخل
لواحد المنتدى لقيت واحد الأخت خليجية كتحلف بأن سكينجبير بوحدو راه منظف
فعال و باللي حملات بيه هي و اخواتاتها , حتى انا ماشي من العاكزين
سكينجبير ما اعطا الله غير هو هنا مشيت لواحد المحل حدايا ديال الباكستان و
شريت منو نص كيلو ديال سكينجبير بحرا جايبينو جديييد و طري , و درت على
الشكل التالي :

فآخر يوم فالدورة , و كل وحدة راه عارفة علامة النهار الأخير من الدورة كيف
كتكون قلييييلة و كتبدا تنقى بشوية و لكن ماشي حتى تنقى كليا لا , المهم
هو تحكي قياس ربع كاس ديال سكينجبير طري بقشرتو غير غسليه فقط و زيدي عليه
نص كاس ديال الما عادي ديال الشرب ماشي سخون و لا مغلي و شربيه على الريق و
تسناي واحد نص ساعة عاد فطري و حاولي تتحركي داك النهار مزيااان ما تبقايش
غير جالسة .





هداكشي اللي درت انا غير شربتو لبست بالزربة كنت دايرة مع واحد الصديقة
نخرجو للشوبين و فعلا ما فطرتش فداري و لكن لبست مزياااان حيث كان الجو
مغيم لبست 2 سراول و المونطو سخون و لي بوط حتى هوما , و مشيت حتى للتران و
خديت واحد الكابوتشينو سخوون مع البتي بان , و غير وصلنا من 11 دالنهار و
احنا تندوروا فالماكازات ما جلسناش حتى وصلات 4 دالعشية و مشينا تغدينا
صديقتي خدات مشروبات باردة من بعد الغدا أنا ما خديت والو حتى حاجة باردة
الى عطشت كنشرب شوية دالما كنخاف تحبسني البولة أعزكم الله و انا ما تنحملش
الطواليطات ديال الزنقة , المهم كملنا و بقينا كنتمشاو تاني حتى ظلام
الحال و شدينا التران و رجعنا مهلوووكين ما وصلت لداري حتى لـ 9 و نص ديال
الليل , مللي طلعت للطواليط أعزكم الله تصدمت فالفوطة ديال أولويز لقيتها
كححححححلة داكشي اللي خرج فيها سببحاااان الله و فيها واحد الريحة غريبة
بحال ريحة السبيطارات داكشي ما عمرني شفتو حتى تخلعت واحد الوقت , الغد ليه
تنقيت كليا و كانت هديك آآآخر دورة ليا الحمد لله حملت فنفس الشهر .

المهم فداك الشهر فاش حملت تعرفت على واحد البنت مغربية الله يعمرها دار
كانت خدامة معايا مللي ساقت الخبار جات باركات ليا و هدرة تجبد الأخرى قالت
ليا بأنها مزوجة 6 سنين هادي و باقي ما جابش الله و السبب أنها طولات
فاستعمال الكينات ديال منع الحمل أكثر من 10 سنين و هي كتاخدهم و الطبيب
اللي مشات عندو تيقوليها ما عندك حتى حل من غير الانتظار , المهم أنا
اعطيتها طريقتي و قلت ليها شنو تدير قالتليا صافي فالويكاند نخرج نشريه
قلتليها بلا ما تشريه راه باقي عندي نص كيلو طري و جبتو ليها الغد ليه و
شرحت ليها طريقتو بالضبط و حتى الأوقات ديال الاباضة, و اول البارح عيطات
ليا تبشرني بأنها حامل فالأسبوع الخامس يا ربي تكمل عليها و ترزقها الذرية
الصالحة هي و كل المنتظرات ان شاء الله , و على فكرة صديقتي استعملات
الوصفة مرتين علما أن الحيض عندها ما منتظماش يعني مرة تجيها على 30 مرة
على 35 مرة 40 يوم و قالت ليا لما استعملاتها المرة الاولى نزل منها فعلا
داكشي كحل و عاود جاتها الحيض من بعدها ب 29 يوم و لما سالات عاودات
استعملات الوصفة و كانت آخر حيض ليها , اللي بغيت نقول للأخوات هو ما
تقنطوش من رحمة الله , و الحاجة الى ما صدقاتش المرة الاولى غادي تصدق ان
شاء الله في مرة من المرات التالية .

و معلومة أخرى مهمة قالتهاليا الساج فام هو أنه ماشي ضروري تكون المعاشرة
قبل يوم الاباضة ب 3 ايام و بعدها بيوم باش تتخصب البويضة, راه حالات كثيرة
وقع بينهم جماع ابتداء من اليوم العاشر من الدورة و وقع حمل سبحان الله
كاين الحيوان المنوي اللي كيعيش حتى 5 ايام و كيكون أقوى .

حاجة أخرى تفكرتها هي أنني فديك الأيام لما تطهرت من الحيض كنت كناخد ملعقة
ديال العسل الحر جبتو من البلاد كندوبها فشوية ديال الما دافي و نشربها
على الريق و عندها فوائد كثيييرة بزااف أهمها أنها كتنظف القولون , و ردو
بالكم أخواتي حيث بزاف كيذوبو العسل فالما مغلي و يتسناوه حتى يدفا و
يشربوه هاد طريقة خاطئة حيث العسل مللي كيتعرض لحرارة عالية كموتوا فيه
جميع الانزيمات الفعالة و مكيستافد منو الانسان غير الحلاوة فقط .

mn9ol

و الله ييسر لجميع المنتظرات يا ربي و يفرحكم بشي حمل قريب ان شاء الله

lah ijazik 3anna kolla khayr. khti ana ba9a bent 9rib ntzawaj 3andi mochkil dyal dawra mamntadmach mchit 3and Dr w 3tatni traitement w ana ba9a mtabb3ah mazal makmmaltouch , walakin lli la7adt annaha kant katjini a3azzaki llah 3 jrs ktira chwia w 2 jrs l akhirin ghir dak lwsakh safi , daba lla 1 jr ktira w 4 jrs ghir lwsakh saaaaaafi bla damm 7achak , imkan tkharb9o lya lhormounat b hadak dwa li 3tatni Dr . wach had skinjbir n9dar ndiro bach ntna99a  wlla lbnat mamzyanch lihom sal7 ghir lmzwjat ?? 3ilman annani ana mabaghach nwlad mobachara ba3d zwaj inchellah bagha nglas wahd lmodda 3ad nfakkro f lwlidat  ila bgha llah

amine alhbiba dyali llah inawrak o ya3tik lkhir kanchkrak bzef, d3iw m3aya 3AFAKOM rah 3arsi 9rib mab9a lya walou o nwalli Madame htta ana hhh khayfa w mtwattra w kanwajjad l3ars inchallah . lah ijazik blkhir akhti boutayna habibat 9albi

Salam , akhti Ana khdit had wasfa ligtli wtantmna anaha tfidni fi3lan nzal mani wsakh ktar man dakchi likont mwalfaha wdaba tantlab lah twaf9ni yarbi 7it omniyti Brit wlidat