* الفطور : حريشات بالزيتون // نصف كيلو من السميدة الرقيقة ، رابعة من السميدة الغليظة ، القليل من الملح ، خمارة حمراء ، نصف كأس مخلط بين الزيت البلدية و العادية ، معلقة صغيرة من الزعتر مطحون و ماء دافئ للعجين .
نجمعو الكل و نكون كرة كبيرة و نلفوها بالسميدة الغليظة و نسرحوها بالمدلك و ناخذو الطابع الدائري و نقطعو به و نطيبوها في المقلاة الثقيلة .
وممكن استعمال نفس المقادير مع نقصان الملح و نضيفو الطون مقطر مزيان و بصلة مشحرة و نجمعوها مع الخليط و نقدموها كحريشات مالحين Sللمساء .
* بينيبي السردين : 1 كيلو من السردين مغسول و محيدين ليه السنسول و القشرة و يشرمل بالشرمولة ديال الحوت ، كأس الفرص و الماء دافئ و شوية الملح و الابزار و الخرقوم البلدي و بيضة و نطربو الكل حتى يولي بحال كيكة ، هاد الخليط كنغطسو فيه السردين و نقليوه و نقدموه بالصحة و الراحة
- سلطة البدنجال : 2 بدنجالات كبار مقطع بالطول و ندردرو الملح و ندخلوه للفرن يتحمر ، و نحضرو صلصة الطماطم و فرماج أحمر و 2 فرماجات مثلثين .
ناخذو طبسيل كيدخل للفرن و نستفو فيه نصف كمية البدنجال و نصبو صلصة الطماطم و نذوبو فيها الفرماج مثلث و نضيفو طبقة أخرى من البدنجال ثم في الأخير الصوص اللي باقة و نحكو الفرماج من فوق و ندخلوه للفرن .
* العشاء : فتات الشطبة // نصف كيلو من مطيشة ، بصل محكوكة ، القزبر و المعدنوس ، الملح و الابزار ، الخرقوم ، كأس صغير من الزيت البلدية ، كأس من العدس و كأس من الفول و الحلبة اختياريا ، 250 غرام من ليباط على شكل نجيمات .
تشحري البصل مع التوابل و مطيشة ثم القطنية و تمرقي و تضيفي المعدنوس طري في الأخير و تقدميها بالصحة و الراحة.
* الفطور : خبيزات النخالة // نصف كيلو من زرع النخالة ، كأس من الفرص ، 2 معالق كبار من الزيت البلدية ، بيضة ، معلقة كبيرة من سنيدة ، معلقة كبيرة من خميرة الخبز ، خمارة حمراء .
تخلطي الكل بالحليب دافئ و القليل من الماء و تخلي العجين تخمر ثم تعملي كويرات و تخليهم يخمرو و تدهني الوجه بالحليب و تفنديهم في النخالة الغليظة و تطيبي في الفرن و تقدميهم بالصحة و الراحة .
* الغذاء : الدجاج ريجيم بالخضر //معلقة من : الابزار و الخرقوم و سكينجبير و نصف كأس من الزيت البلدية و القليل من الماء ، تشرملي الدجاج و تعمليها في كوكوط مع عرش الأزير و السالمية و المعدنوس و تشدي عليهم يطيبو بالمهل .
تقطعي الخيزو شرائح و تفوريه في كسكاس يوضع فوق الطنجرة اللي فيها الدجاجة مدة 5 دقائق ثم تضيفي ليه البطاطا تكون مغسولة و بالقشرة ديالها و مقسومة على جوج تتبخر هي أيضا مدة 5 دقائق ، ثم تشحريهم مع شوية الزبدة .
تاخذي اللوبيا و تشحريها مع الزيت البلدية و الثومة و الملح و الابزار و المعدنوس .
بعدما تفتحي على الدجاج ممكن تحمريه في الفرن و تقدميه مصاحب للخضر بالصحة و الراحة .
- سلطة خردولة : بصلة مشلظة و الفلفلة بالألوان و الكرعة الخضراء و البدنجال ، الكل مقطع طريفات صغار و تنسمي بالزيت البلدية و الملح و الابزار و تشدي عليهم في كوكط حتى يطيبو و يتحمرو و نقدموهم بالصحة و الراحة.
* العشاء : شربة البطاطا الحلوة و الكرعة الحمراء // بورو مشلظ مع البصل و الزبدة و الملح و الابزار و تشحريهم و تخليهم جانبا .
الكرعة الحمراء و البطاطا الحلوة مقطعين صغار يطيبو مع الماء و الملح و الابزار و الكرافس و ورقة سيدنا موسى و فاش يطيبو نزولو الكرافس و ورقة سيدنا موسى ثم تطحني الطل مع الفرماج مربع أو القشدة الطرية ثم تضيفي البورو و البصل و تطحني حتى تختر و تقدم مصاحبة مع الجبن و البيض مصلوق و خبيزات الشعير بالصحة و الراحة.
الفطور : كيكة بالكاكاو
- السيرو : كأس من الكاكاو ، كأس من سنيدة ، 2 كيسان من الماء ، معلقة كبيرة من القهوة سريعة الذوبان ، تعسليهم بالمهل مع التحراك بلا ما يغلي .
- الخليط : 3 البيضات ، كأس من سنيدة ، كأس من الزيت ، 2 خمارات ، 2 كيسان من الطحين ، تاخذي كأس من السيرو و تخلطي فيه باقي المكونات و تدخليها للفرن تطيب ، فاش تطيب الكيكة تسقيها بالسيرو حتى تتشرب مزيان .
ممكن الحفاظ عليها مدة 10 أيام .
* الغذاء : اللحم بنكهة الكامون
الملج أو ضلعة الغنمي ، معلقة صغيرة من الكامون ، الملح ، الثومة محكوكة بشكل كثير ، و ترقدي اللحم في الشرمولة يشرب البنة ، في طنجرة تضيفي نصف كأس زيت المائدة ، شوية من الزعفران الحر و معلقة من السمن و القليل من الماء ، نطيبو اللحم بالمهل مع القليل من المرق و نخليوه يشرب مزيان و ممكن التزيين باللوز مقلي أو الفطر و نقدموه بالصحة و الراحة .
- سلطة البطاطا حلوة : بصلة مشلظة و راس ثومة محكوك و الخرقوم و سكينجبير و الملح و معلقة من سنيدة اختياريا و حفنة من الزبيب مرقد في الماء و شوية القرفة و تشرملي البطاطا و تخليها تطيب بالمهل بالصحة و الراحة .
* العشاء : لازانيا بالكريب // نوجدو الكريب مالحين ومنسمين بالثومة غبرة و المعدنوس و الملح و نطيبوهم .
نحضرو البيشامل مع اضافة نصف ضامة بنة الى المقومات الاعتيادية .
صلصة الطماطم : بصلة محكوكة ، مطيشة محكوكة و مركز الطماطم ، 2 ضروس ثومة ، ملح و ابزار و نصف ضامة البنة و القمرون أو الكفتة .
في مول كيدخل للفرن نعملو تفريشة الكريب ثم الصلصة ثم البيشاميل حتى انتهاء العملية و نرشو الفرماج و ندخلوهم للفرن و نقدموهم بالصحة و الراحة.
* الفطور : طوسط بالقمح الكامل // 500 غرام الى 600 غرام قمح بالنخالة ، ملح ، معلقة من الزيت البلدية ، خميرة الخبز و ممكن اضافة ايلان .
تجمعي الكل و توضعيه في اناء الفرن المستطيل ثم تخليه يخمر و تلويه في ورق الطهي و تخليه يطيب ثم تتركيه يوما كاملا و تقطعيه .
فكرة لتقديمه للأطفال : ترشمي الطوسط من الوسط و توضعيها في مقلاة و تفقسي عليها بيضة و تطيبيها على اللبابة و تقدميها بالصحة و الراحة .
* الدجاج بالليمون في الفرن : دجاجة مغسولة ، ملح ، الربيع مكرض ، السمن ، الخرقوم ، سكينجبير طري ، الزعفران الحر ، الزيت البلدية و ترقدي الدجاج في هذه التوابل ، تضيفي كأس مخلط مابين عصير البرتقال و الماء و تسكبيه على الدجاج حتى يتشرب و تدخليه للفرن مغطي و تخليه يطيب بالمهل .
شيبس بالبطاطس : شرائح البطاطاس و تخلطيها بالملح و الخل و ممكن اضافة الحار أو السودانية و تدهني الفرن بالزيت البلدية و تدخليها للفرن تتحمر .
* العشاء : محمصة في بالخضر // كيلو مطيشة محكوكة ، بصلة محكوكة ، الزيت البلدية و طريفات من اللحم أو بيبي ، ملح و السمن ، 1 خيزو مقطع طريفات صغار ، بطاطا مقطعة طريفات صغار ، الفول الطري و شوية المحمصة مرطبة ، و الجلبانة الطرية ، معلقة كبيرة من مركز الطماطم ، التحميرة و الخرقوم و سكينجبير و ضامة البنة .
تقلي الطل في طنجرة ثم تضيفي الماء و تشدي عليها حتى يطيب الكل و تزيدي في الأخير المحمصة و تخليها تطيب بالمهل .
* الفطور : كيكة مفتولة // 200 غرام من الدقيق ، 100 غرام من سنيدة ، 50 غرام من الزبدة ، 1 فاني ، بيضة و كريمة الباتيسيير ديال الكيس .
تطربي البيضة و تدفقيها على الدقيق و تبداي في الفتيل ديالو ، في اناء كيدخل للفرن تدهنيه بالزبدة تاخذي نصف الخليط و توضعيه ثم تسكبي عليه كريمة الباتيسيير ثم تضيفي النصف الثاني و تدخليه للفرن يطيب ثتحكي الشكلاط من فوق و تقدميها بالصحة و الراحة .
* الغذاء : الشواء في كوكوط // اللحم حسب المتوفر ، الكامون و الابزار و القزبر يابس و الزعفران شعرة و الملح ، تشرملي اللحم بهاد التوابل حتى يشرب البنة ثم توضعيه في كوكوط و تشدي عليه يطيب على نار مهيلة ثم توضعيه في اناء الفرن بعدما تدهنيه بالزبدة و تخليه يتحمر و تقدميه مزين بسلطة خضراء و الخضر .
- عصير الحامض : الحمض مغسول و يبات في الماء ، في الغذ تحكي القشرة ديالو و تخليه جانبا و تعصري الحامض ، كل كيلو من الحامض تعملي معاه نصف كيلو سنيدة ، ثم توضعي العصير في علبة مدة 24 دقيقة و تطحنيه مزيان ثم تصفيه و توضعيه في الثلاجة كروح الحامض و تبداي في استعماله كعصير مع الفواكه .
* بيتزا بالخضر : الكرعة الخضراء و الخيزو محكوكين بالطول ، تشلظب بصلة و شوية الكفتة أو طريفات الدجاج و تخلطي الكل مع الابزار و الملح و القزبر يابس و سكينجبير ثم تضيفي الخضر فوق العجين ديال البيتزا و تترشي بالفرماج الأحمر و تدخليها للفرن و تقدميها بالصحة و الراحة .