تجاربنا فالاقتصاد و التوفير لنتبادل أفكارنا

تاريخ التسجيل : 06/09/2012

السلام عليكم ورحمة الله

انطلاقا من مبدا التعاون على الزمان والاقتصاد والاستهلاك بدون اسراف اقترح عليكم اخواتي ان نضع تجاربنا فهاد الموضوع

طبعا تجاربنا فالاقتصاد و التوفير باش لي دخل استافد ان شاء الله

ولنا ولكن الاجر لان المنتدى افادة واستفادة وكاين بزاف ديال الاخوات لي كيقلبوا على طرق للاقتصاد و التوفير خاصة في ظل غلاء المعيشة

انا غادي ندخل كل مرة ونحط ليكم تجاربي وايضا اي حاجة لقيتها لي تقدر تنفعكوم وكنتمنى تديرو بحالي كل حسب خبرتو واستطاعتوا طبعا فلا يكلف الله نفسا الا وسعها

كنتمنى الفكرة تكون وصلتكم اخواتي و السلام عليكم

الخبز نحاولو نبعدو من خبز الزنقة اولا ماشي صحي ثانيا غالي

والا شريناه اشاط لينا ما نلوحوهش

قطعيه بحال تقطاع لفقاس ثم نغطسوه في بيضة مطربة و كاس دلحليب و تانقليه في زيت و تاندردر عليه سنيدة تيجي غزال و لذيذ، أو لمحبات للحاجات المالحة نذهنهم بزيت بلدية و ندخلهوم فران يتحمرو شوية ، من بعد نديرو صلصة مطيشة ، زعتر ، طون زيتون فليفلة و موزاريلا تيجو على شكل بيتزات صغاروسبق لي حطيتو فالمنتدى

وتقدري تدخليه للفريكو وشي نهار خرجيه اسخنيه او ديري بيه الرفيسة الكدابة اولا نشفيه فالفران اطحنيه وحصلي على لاشابلور استعمليها للحوت ملي تكوني غتقليه او الدجاج باني

القريصات الا شاطو ليك قطعيهم بحال الفقاص احمريهم فالفران كيجيو فنين

مواد التنظيف نقدرو نقتاصدو فيهم

مثلا كنشريو 2ليتر من سانيكروا، فقسميهم على جوج القراعي و زيدي عليهم الما، راه كيبقى نفس المفعول و هانتي عندك 2 قرعات سانيكروا

جافيل حتى هو ما تاخديش ديال العبار خدي اتشي راه مجهد وحتى هو تقدري تقسميه على جوج وتزيدي الماء

صاوبي الصابون السائل بصابون الكف و الماء وساشي ديال سانيكروى وبقاي تستعمليه فالتصبين رائع كيصبن وكيطيح ارخيص

الكنفتور صاوبيه فالدار كيكون الذ وارخص

مطشة ديال الحك جربي تصاوبيها فالدار وحفظيها فالمجمد والا ما صاوبتيهاش خدي الغراف الكبير وقسميه فمربعات ديال الثلج وكونجليه ثم حيديه وجمعي المربعات

فميكة وما غاديش تفسد ليك بدل ما تبقاي كل مرة تاخدي غراف صغير ب 50 الا 60 ريال

نصيحة مجربة ما تبقاوش تتقضاو من الاسواق الكبرى تقضاو من عند الهريات احسن كتشري الضروري وما تخسريش الفلوس فالسقاطة و الكماليات

البريزات ديال التلفزة و الريسيفر و الحاسوب حيديهم فالليل راه كيستهلكو الضو

الثلاجة ما تبقايش تحليها بزاف حاولي تخرجي منها داكشي لي غتحتاجي مرة وحدة و الاع ند وليدات عمري ليهم طيرمو ديال الماء باش ما يبقاوش احلو ليك الثلاجة بزاف خصوصا فالصيف

ببالتسبة للصابون لي كانغسلو بيه لماعن كانخلطوه ونديرو فقرعة مايونيز او كتشوب هدوك ديال لبلاستيكوكانبداو نخويو غير شوية فلحلفة دلماعن هكذا مكيضيعش احسن ماتبقاي ضيفي الصابون وتخلطي بالما كل مرة كاتحسي بالرغوة مشات
معرفتش واش عرفت نوصل لكم الفكرة
وكذلك فلحمام كناخد قرعة فيري خاوية كانخلط فيها صابون وجافيل وكانزيد لما كايجي عملي واقتصادي فنفس الوقت

الصلصة ديال سباكيتي صاوبيها بكثرة وديريها فعلب محكمة الاغلاق الكمية لي غادي تحتاجي طبعا ودخليها للفريكو وايضا ديال البيتزا

تجاربنا فالاقتصاد و التوفير لنتبادل أفكارنا 1017303_412480365531767_1153896958_n

تاريخ التسجيل : 15/05/2013

لهلا يخطيك الزين وشكرا بزاف على هده المعلومات

تاريخ التسجيل : 30/06/2012

1 ريحة ديال تلاجتي ديما غزالة ملي كنغسلها كنمسحها بماء الزهر

2 المانطات و ليزور و الكوفرليات ملي كنجمعهم كندير وسطهم صابونة ديال دوف ملي تنجبدها تلقى ريحتها غزالة

3 بالنسبة لقشور الكروفيط ماعمركي ترميهم
شديهم حمريهم فالفران بلا مايتحرقوا يعني غير يكرموا صافي سخني الفران وطفيه وخشيهم دغيا تاييبسوا
ملي ييبسوا طحنيهم مزيان و غربليهم وديريهم فقريعة وخليهم للروز ولا لاسوب راه بحال ايلا دايرة الكروفيط نيت هههه

كذلك قشور اللوز نفس الطريقة تانديرهم مع حلويات والكيك تايجيوا غزالين

4 الكل تايعرف انه الخل من غير وظيفته الغدائية ممكن نمسحوا ونلمعوا بيه الزاج تايخرج تايشعل

5 الاحذية اعزكم الله ديال الدان متيصلاحش معاها سيراج وخصوصا اللي لونها بني
ماعليك غير تمسحيها بمشروب القهوة تاتخرج تاتشعل وبحال لو هي باقية جديدة

6 مللي تانستعمل صابون الحجرة اكيد تايبقاوا ديك البقايا دوبيهم فالما وجمعيهم فبواط خليهم لتصبين المنيدلات ولا طبايع اللي متيبغيوش يخرجوا دهنيهم بالصابون وخليهم شوية فالشمش ورجعي فركي تايزول بسهولة

7 شاط ليك خبز الزنقة وبردخوديه قطعيه طريفات و فزكيه بالحليب وزيدي عليه مقادير الكيك و ديريه بلاصة الدقيق طيبيه عادي تايجي كيك رآائع

8 الطنجرة ايلا تحرقات ليا تندير فيها الماء و الملح و نغليهم فوق النار تنظف بيهم بسهولة

إوى براكة ولا نزيدكم ههههههه

تاريخ التسجيل : 04/04/2013

merci boucoup Smile

» شانيل؛ فوريفر ؛ماك؛ ماكس؛ فاكتور ؛تجاربنا الناجحة معهم بالصور
» الفوضى في التحكم في الدخل الشهري و عدم استطاعته التوفير
» التعاون على الزمان والاقتصاد والاستهلاك بدون اسراف إلى الأخوات لي تيقلبو على طرق التوفير و الإقتصاد

تجاربنا فالاقتصاد و التوفير لنتبادل أفكارنا

تجاربنا فالاقتصاد و التوفير لنتبادل أفكارنا

مواضيع مماثلة

مواضيع مماثلة