السلام عليكم الحادكات

صباح الخير عليكم , اش خباركم ؟؟؟

اليوم جبت ليكم واحد الملوي فشي شكل

حنا موالفين كنعجنو الملوي او المسمن بالفورص وشوية ديال القمح دالبقال او كين لي كتدير الفورص بوحدو

انا اليوم جبت ليكم واحد الطريقة كنديرها انا للملوي والمسمن ديالي,
الملوي الالة كنعجنو بالدقيق الكامل , يعني القمح بنخالتو , ( كنغربلو ونحيد النخالة الغليضة ونخلي الرقيقة ,)
كنستعمل الدقيق الكامل نظراا للفوائد الكبيــــــــــــــــــرة ديالو ,
وصراحة كيجي بنين وزوين

المهم نبداو على بركة الله ..


>> المقادير

عندنا الدقيق الكامل ,الفورص , الملح , الخميرة , شوية سنيدة ,

زبدة وزيت للتوراق , فاني( لي بغات ,)

غير هو بحال يلا خديتي 1 كيلو ديال القمح ديري معاه 1/2 كيلو ديال الفورص او اقل , غير باش يتجمع القمح ,
وانا كنزيد طريف ديال الزبدة مع العجين ,
والخميرة غير شوية , انا كنفضل نديرها باش تنفخو ليا شوية لي مبغاتش ديرها بلاش ,

>> الطريقة

كنعجنو عااادي كيفما كنعرفو كاملين عجينة الملوي ,
ونخليوها ترتاح شوية

كنكونو منها كويرات








ونبسطوهم فوق طاولة مدهونة بالزيت





حتى كتولي شفافة ونرشوها بخليط الزبدة والزيت والسميدة الرقيقة

كنشدو القطاعة ديال البيتزا او الجرارة
ونبداو نقطعو الورقة بشكل طولي على حسب قد الورقة 3 او 4 الاشرطة




نبداو لفو الشريط الاول ونحطوه فوق الشريط التاني ونحطوه فوق التالت



حتى نكمولو جميع الاشرطة



ونحصلو على رولو شريط فوسط شريط نوقفوها على طول ونضغطو عليها

باش تكرص



وهكذا نمشيو بنفس الطريقة حتى نكملو كاع الكريصات لي عندنا









كنبسطوهم









ونسخنو المقلة ديالنا مزيان نرشوها بالزيت ونلوحو فيها الملوية ديالنا طيب من زوج جوايه



وهاهو واجد بالصحة والراحة













انا لي بغيت يوصل من هاد الموضوع زوج حاجات

>> اولا انه تجربو الدقيق الكامل لانه صحي جدا للناس لي عندهم المصران او المعدة او حتى الناس لي عندهم السكر لانه كنعرفو انه الفورص غني جداا بالسكريات خص مريض السكر يمتانع عليه
كما ان الدقيق الكامل كيعاون فالريجيم والفوائد ديالو عديــــــــدة غادي نحطها في موضوع اخر ان شاء الله

>> تانيا الطريقة ديال التوراق ديال الملوي باش كيجي مشتت
صراحة يلا غير عجنتيه بالفورص غادي يجي وااااااعر ومشتت بحال ديال برااا ,


ايوا هذي هي طريقتي فالملوي

سمحو لي يلا كان المستوى ديالي شوية هابط راه او مشاركة غير دوزوها ليا ههههههه