نصائح عامة لإنجاح الكيك بكل انواعه
حاجات كثيرة كتخلي الكيك اما ناجح او لا

اول شيء الدقيق ، نوعية الدقيق المستعمل ،
خص يكون من النوع الجيد و جديد ميكونش دقيق قديم او برد او بدا يغمال
ايضا كيخصك ديما تغربلي الدقيق 3 مرات لما تبغي تعملي اي نوع حلوى او حتى خبز
هكا كيجي العجين ديالو خفيف و مكيتشكلوش فيها حبيبات او كويرات دقيق


ثانيا الخميرة المستعملة حتى هي خصها تكون جديدة و محفوظة بطريقة جديدة
باش متوصلهاش البرودة اوالسخونة او الغمولة واخا تكون فالعلبة ديالها


ثالثا البيض كيخصو يكون جديد و طري و بدرجة حرارة المطبخ ماشي بارد


رابعا الخل اي كيك بغيتيه يجيك خفيف او حتى خبز عملي فيه ملعقة خل و قبصة ملح كيساعد الدقيق فالتخمير و كيخفف العجينة


خامسا الفرن و هذا مهم جدا حيت حتى لو عملتي كلشي كيف وجب و الفران مكانش مزيان فكيخلي الكيك يفشل
كيخصك تعرفي فرانك ، كل فرن وحرارتو و كل فرن و كيف كيحفظ الحارة ، كاين الفرن للي كيتريڭلا مزيان و كيحافظ على حرارة مستقرة و كاين للي لا غير كيسخن كينقص حرارتو او بالعكس كيزيدها و كيحرق الحاجة

درجة الحرارة المناسبة للكيك كتكون بين 150 c° و 200 c° حسب كل فرن

و الكيك كيبغي يطيب فالوسط ديال الفرن بين الحرارة العليا والسفلى فالوسط تماما
باش يجيك الكيك رطب عملي شوية ماء فالطاوة باش كتحافظ على رطوبة الفرن و مكيجيش الكيك قاسح و ناشف بعد الطياب

ممنوع تحلي الفران على الكيك و هو كيطيب او باقي مبردش حيت كتدخلي عليه البرد و كيفشو
متخرجي الكيك من الفرن حتى يبرد تماما باش يبقى منفوخ و ميضربوش ليك البرد



و طبعا دائما قبل متبداي فشي وصفة توكلي على الله و قولي بسم الله و سبقي النية الحسنة و ربي كيسسر

و مع التجربة راك تولي تعرفي الفرن ديالك و تحفظيه و تعرفي الحرارة للي كيطيب بيها الكيك بشكل افضل