بسم الله الرحمن الرحيم


السلام عليكم ورحمة الله وبركاته


النهاردة بقي انا جاية وجايبلكم حاجة جديدة
انا مش هاقول نظام نمشي عليه ولا تفتيح ولا تغميق
لا..........لا
النهاردة زي العنوان مابيقول:
هاتعملي ايه لو عندك مناسبة جامدة جدا جدا وعايزة تكوني ملكة متوجة علي عرشها في اليوم دهيعني عيد جوازك ولا جوزك خلاص جاي من السفر

زي ماعودتكم هاكون معاكم في كل مناسبة
(بس كلمة في سرك انتي لازم تكوني بقالك فترة مهتمة ببشرتك وشعرك وجسمك وتكوني خسيتي كدا كام كيلو حلوين،عشان احنا هنا هانعمل الرتوش الاخيرة،
تمام كدا يلا بقي نبتدي

قبلها بيومين:
ودي بقي هاتكون حملة التنضيف الشاملة اللي هاتقومي بيها علي كل شعراية في جسمك
-اول حاجة:
هاتقومي تجيبي ملح عادي بتاع الاكل ده ونقطتين تلاتة زيت زيتون وتدخلي الشاور بلي جسمك مية سخنة تمام وابتدي بقي ادعكي جسمك بالملح والزيت وكل فتفوتة في جسمك ادعكيها (مش بالليفة طبعا بايديكي)
-هاتي ليفة ناعمة شوية وحطي عليها شوية خل تفاح او حتي خل ابيض عادي وليفي جسمك(عشان نشيل اثار الزيت خالص)
-اخرجي بقي نعيما وابتدي الحرب ،انتو عارفين طبعا انا من مشجعي السويت ودلوقتي انا بستخدم الواكس وهو تحفة تحفة تحفة(باذن الله هاكتبلكم موضوع مفصل عن جهاز الواكس)
امسكي السويت او الواكس او براون اللي انتي عايزاه وشيلي كل شعراية في جسمك بجد كل شعراية ماتسبيش حاجة
-بعد بقي ماخلصتي الماتش الجامد موت ده هاتي نشا بقي وليمون وحطيهم علي جسمك وسيبيها حوالي 10 دقايق وادخلي ياقمر بس اشطفي جسمك شطف وبزيت زيتون ورطبي جسمك

-طبعا وشك بردو لازم تعمليه النهاردة عشان يهدي كدا ويروق قبل اليوم الموعود،وبردو اما بالفتلة او الشمع او براون الطريقة اللي بترتاحي عليها
-بعد ماتخلصي وشك هاتي تلجة وحطيها في قطنة ومشيها علي وشك لمدة 5 دقايق وبمية ورد ساقعة رشي وشك تمام،وياريت لو تدهني وشك بلوشن ملطف كدا يهدي الجو

قبلها بيوم بقي:
النهاردة بقي مرحلة فاصلة والشغل كله

-ادخلي الحمام وهاتي طبق فيه سدر مطحون وعليه كمية لبن (بحيث يتعجن بيه بس ميكونش سائل لا يكون بردو ماسك نفسه كويس)وعصرة ليمونة
وادهني جسمك حتة حتة وبعدين ابدائي افركي جسمك بايديكي لحد ماالخلطة تنشف علي جسمك وتبتدي تتفرك خالص وطبعا هاتنزل معاها البلاء والبلي،ملكيش دعوة افضلي افركي بايديكي لحد ماجسمك يتشال من عليه كل الخلطة،
-انزلي بقي تحت مية فاترة واشطفي جسمك بايديكي بس حاسبي لا تتزحلقي اصل جسمك هايزفلط ومش هاتعرفي تمسكيه من النعومة

-اخرجي بقي وادهني جسمك زيت زيتون لا اكثر

بشرتك:
اللي هي مرايتك واوعي تفكري انها مش مهمة لا دي اهم حاجة وهي اللي بتعكس جمالك وانوثتك
-هانعمل تنضيف محترم لبشرتنا تمام التمام
هاتي حلة وحطيها علي النار وفيها مية لحد ماتغلي
حطي فيها شوية بابونج ونعناع طازة وشريحة ليمون
عرضي بشرتك للبخار لمدة 5 دقايق

-وبعدين اخرجي من البخارحطي الماسك ده علي وشك(ترمس مطحون+ارز مطحون+قطعة خميرة صغيرة+نص معلقة عسل+نص معلقة زبادي+نقطتين ليمون بس)
وافرديه علي وشك وبعدين ارجعي للبخار تاني حوالي 7 دقايق وطول الوقت ده افركي بشرتك بحركات دائرية بس خفيفة

-خلاص اشطفي وشك بقي بمية فاترة مش سخنة ولا باردة ونشفي وشك بالراحة ورشي مية ورد ساقعة اوي علي وشك وياسلام بردو لو تلجة في قطنة وتمشيها علي وشك

كدا بقي جسمك ووشك بقوا زي القشطة لمعان ونعومة ماقولكيش

فاضل ايه بقي ياست الفتوكة
لا دا فاضل تكملة الانوثة والشياكة
الباديكير

-هاتي طبق بلاستيك كبير وحطي فيه مية سخنة بقدر الاحتمال وحطي فيها
(ملح +شوية شاور جل بسيط+معلقة صغيرة بيكنج بودر +نقطتين زيت زيتون)
انقعي رجليكي لمدة 15 دقيقة وبعدين هاتي الحجر الخفاف وادها دعك محترم من فوق ومن تحت ومن كل حتة
-بفرشة سنان قديمة افركي ضوافر رجليكي
-نشفي رجليكي وهاتي المبرد الخشب وابرديها كدا بشكل ظريف
ادهني رجليكي فازلين او كارباميد والبسي شراب قطن
وطبعا نفس الوضع مع اديكي الحلوين بس الاول هانجيب شوية ملح حليب وزيت زيتون ونعمل بيهم تقشير لايدينا
اليوم الموعود بقي ياجميلة الجميلات:

انتي النهاردة ملكة ولازم تدلعي وبس النهاردة هاتتعطري وتتبخري عشان تكوني ملكة حبيبك وجوزك بلا منازع

هاتقومي تجيبي مجموعة الزيوت بتاع شعرك وتعملي حمام زيت خفيف كدا لشعرك

-خشي بقي ع الشاور اغسلي شعرك الاول كويس
وهاتي ليفة مش خشنة وادعكي جسمك ب (شاور جل عليه نص معلقة زيت زيتون+معلقتين مية ورد+نقطتين عطر مركز انتي بتحبيه)
-اشطفي جسمك كويس ونشفي علي خفيف وانتي لسة في الحمام تجيبي زيت بيبي جونسون وتحطي كمية في ايديكي وحطي عليهم بردوا نقطتين عطرك المركز ورطبي جسمك كله كله

-علي طول ورا الزيت البودرة المعطرة هاتلاقي جسمك امتصها ودابت مع الزيت وبقي جسمك ريحته خرافة

-اخرجي بقي ياست العرايس تكوني محضرة بخور شيك اوي(انا طبعا بستخدم فحم سريع الاشتعال عشان ميعملش دخان ولا يكون ليه ريحة وبيشتعل بسرعة)
البسي اسدال الصلاة واقفلي الكمام كويس وحطي المبخرة جوة الاسدال وبخري جسمك بقي لمدة دقيقتين(بس الله يخليكي خدي بالك ابعدي عن الفحم)وشعرك طبعا بخريه وهو لسة مبلول

والله العظيم لما تخلصي هاتبقي عبارة عن ازازة برفان متحرك بتنشري العطر في كل حتة

-يلا بقي نشفي شعرك وسشوريه وورينا الجمال واخر خطوة بردو نقطتين عطرك المركز وافريهم علي اطراف شعرك كدا واااااااااااااااو بجد

-تكوني مجهزة طقم شيك كدا علي زوقك البسيه
وياريت صندل بكعب مغري كدا وخلخال بسيط وشيك
(ماانتي بقي عاملة باديكير اخر جمال)
-سرحي شعرك كدا او حتي سيبيه مفرود
-وميكب خفيف وبرفان بتاعك علي الهدوم

وبصي بقي في المراية ............... بذمتك مش احلي كمان من الاميرات ............امال ايه انتي كنتي فاكرة انك اقل من اللي بيطلعوا في التليفزيون لا داانتي احلي واشيك كمان
وربنا يهنينا كلنا مع ازواجنا
واهم حاجة اخلصوا النية عشان كل التعب ده يبقي في ميزان حسناتكم



بصراحة الموضوع عجبني كتير وقلت لنفسي انقله حتى تستفيدوا يابنات
انا ماتهمني الردود اللي يهمني تهتموا بنفسكم مشان تقاومو الفسق اللي بيتعرضولو رجالكم