السلام عليكم لالياتي الحادكات

اليوم جبت ليكم غديوة غزالة

وهي السردين فالفران

حاجتنا يا لالة ل...


>> سردين ( على قد ما بغيتي 1 ك او 1/2 ك ) المهم منقي ومغسول ومحيدة لو السلسول والراس ومنقياه

>> شوية بطاطا ( ننقيوها ونقطعوها دواور ) , انا بطاطا كنديرها بزاف جهد كيلو الا قل شوية ,

>>حبة حتى 2 حبات بصل ( منقية ومقطعة دواور )

>> شرمولة ( تحميرة , كمون , ابزار , سكينجبير , ملح , ثوم , قزبر ومعدنوس , حامضة , زعتر مطحون , خرقوم , زيت )

كنخلطو الشرمولة كلها ونبداو نحطو منها شوية فكل سردينة ونعملو فوقها وحدة اخرى ( بالطريقة العادية لي كنديرو فاش كنقليوها )

دكشي لي بقا لنا من الشرمولة نزيدو عليه الما لي غادي يكفينا باش يطيب ( تقريبا كا حتى كاس ونص على حسب الكمية وقد المول )


كناخدو المول نتاع الفرن , ونستفو اولا البصلة دوائر عاد نصف كمية البطاطا ونسقيوها بشوية الشرمولة لي زدنا لها الماء
نستفو من بعد السردين ونعملو فوق منو كمية البطاطا لي بقات ( من الاحسن نديرو كمية البطاطا فالتحت اكثر من الفوق , )

ومن بعد نسقيو بكمية الشرمولة لي بقات لنا , بغيتي ديري فوق من هدشي فلفة مقطعة دوائر ديريها مابغيتيش بلاش ,

( انا مكنديرهاش بحيت كدير لي الحرقة مع الحمل )




من بعد دخليها الفرن ( ويلا بغيتي تغطيها بالالومنيوم غطيها انا شخصيا كنستغنى عليه )

صافي وخليها تطيب تقريبا شي 15 د المهم بقاي دخلي السكين فالبطاطا حتى تشوفيها طابت والماء نشف ( حيت الحوت كيطيب هو الاول دغيا دكشي علاش قيسي الطياب بالبطاطا )

والمدة على حسب الكمية كيف ما قلت

( حيت انا كنعمل كمية ديال زوج اشخاص انا وراجلي فقط , تقريبا نصف ك سردين وكيلو الا شوية ديال بطاطا

من بعد خرجيها وبالصحة والراحة




>> غير هو حرصو يكون من الفران للمعدة نيشان ههههههههه باش تبقا البنة

كيجي لذيذ بزاااااف وصحي بلا دهون ولا والوو ,

وسمحو لي مصورتش المراحل كلشي يدي كانو مرونين هههههههه

بصحتك يالالة أم رفيدة يارب يخليها ليك

وتيعجبني أسلوب شرحك واضح ومرح لله يخليك ديما هكذا